Qostanaı memlekettik pedagogıkalyq ınstıtýtynda osydan birer jyl buryn Qazaqstan halqy assambleıasy kafedrasy ashylǵan bolatyn.
Elbasy saıasatyn nasıhattaıtyn, Qazaqstandaǵy dostyqtyń, tatýlyqtyń naǵyz úlgisin kórsetetin kafedra qyzyqty sharalardyń ortalyǵyna da aınalǵan. Nursultan Nazarbaevtyń «Bolashaqqa baǵdar: rýhanı jańǵyrý» maqalasy stýdent jastarǵa aıqyn jumys baǵytyn meńzedi. Maqalada aıtylǵandaı, «Týǵan jer» baǵdarlamasy boıynsha óńir tarıhyn, tulǵalaryn bilý, ulttyq dástúrdi, salt-sanany jańǵyrtý, oǵan úles qosý kafedra jumysynyń baǵdaryna aınaldy. Osyǵan oraı kafedra ınstıtýtta Qazaqstan halqy Assambleıasynyń múshesi, aqyn, QR bilim berý isiniń úzdigi, ardager ustaz Aleksandra Sýslovamen kezdesý ótkizdi.
Kezdesýde Aleksandra Ilınıchna óziniń shyǵarmashylyǵy jóninde, óleńge qalaı kelgenin, ómir jolyn áńgimelep berdi. Sonymen qatar óleńderin oqydy. Ol búginde «Solnse na resnıse», «Prıkosnovenıe», «Rıabınovyı prıvkýs», «S kem povedeshsıa», «Davaı drýjıt» atty kitaptardyń avtory. Aleksandra Ilınıchnanyń Qazaqstan, týǵan jer, tabıǵat, qazaqtar dástúri týraly patrıottyq jáne búldirshinderge arnalǵan óleńderi jastardyń ystyq yqylasyna bólendi.
«Men baqytty adammyn. Qazaqstanǵa eki jarym jasymda kelgen ekenmin, óstim, óndim, bilim aldym, ustaz, aqyn atandym. О́leńderimde Reseı, sen keń baıtaqsyń, biraq Qazaqstandy saǵynamyn, ol – meniń úıim ǵoı» degen oı aıtqan edim», deıdi aqyn Aleksandra Sýslova.
«Mundaı jastardy rýhanı baıytatyn kezdesýler óte qajet. Jastar eki saǵat boıy aqyn óleńderi men áńgimelerin uıyp tyńdady, oǵan suraqtar qoıdy. Ádebıet te bizdiń ulttyq kodymyzdy, ulttyq tamyrymyzdy saqtaıtyn quraldyń biri. Elbasy maqalasynda búgingi jastardyń zamanaýı, básekege qabiletti bilimdi bolýymen qatar, mádenıettiń, rýhanı baılyqtyń da mańyzdylyǵy aıtyldy. «Týǵan jer» baǵdarlamasy jastarǵa aldymen ultyńnyń, týǵan jerińniń, ólkeńniń tarıhyn tulǵalaryn, shejiresin, ádebıet, mádenıetin tanýǵa meńzeıdi. Kezdesý de jastarǵa osyny túsindirgendeı boldy», deıdi Qazaqstan halqy Assambleıasy kafedrasynyń meńgerýshisi Olga Evdokımova.
Kezdesýde ınstıtýt stýdentteri aqyn keshin án-kúımen órnektep otyrdy.
Názıra JÁRIMBET, «Egemen Qazaqstan»
Qostanaı